შესახებ
სოხუმის სახელმწიფო უნივერსიტეტის ისტორია სათავეს იღებს 1932 წლის 7 თებერვალს, როდესაც საქართველოს მთავრობის გადაწყვეტილებით ქ. სოხუმში პედაგოგიური ინსტიტუტი დაარსდა. თავდაპირველად, სოხუმის პედაგოგიურ ინსტიტუტში ორი კათედრა არსებობდა და ძირითადად პედაგოგიურ კადრებს ამზადებდა. მომდევნო წლებში ინსტიტუტს სხვა სპეციალობებიც დაემატა და 1960-იანი წლებიდან პედაგოგიური ინსტიტუტი რეგიონის წამყვან საგანმანათლებლო და სამეცნიერო ცენტრად იქცა, სადაც სასწავლო პროცესი ქართულ, აფხაზურ და რუსულ ენებზე წარმოებდა. 1979 წელს სოხუმის პედაგოგიური ინსტიტუტს ეწოდა აფხაზეთის სახელმწიფო (სოხუმის) უნივერსიტეტი.
1989 წლის ცნობილი პოლიტიკური მოვლენების შემდეგ, აფხაზეთის (სოხუმის) სახელმწიფო უნივერსიტეტს გამოეყო ქართული ნაწილი, რომელიც აფხაზეთის უნივერსიტეტის პროფესორ-მასწავლებელთა და სტუდენტთა უმრავლესობას აერთიანებდა. 1989 წლის 14 მაისს, საქართველოს მთავრობის გადაწყვეტილებით, უნივერსიტეტის ქართულ ნაწილს ივ. ჯავახიშვილის სახელობის თბილისის სახელმ-წიფო უნივერსიტეტის სოხუმის ფილიალი ეწოდა, რომელმაც აფხაზეთის ტრაგედიის შემდეგ, 1993 წლიდან ქ. თბილისში, დევნილობაში გააგრძელა ფუნქციონირება.
2007 წლის 31 ივლისს საქართველოს მთავრობის დადგენილებით თსუ სოხუმის ფილიალის ბაზაზე დაფუძნდა საჯარო სამართლის იურიდიული პირი - სოხუმის უნივერსიტეტი. 2008 წლის 4 იანვარს უნივერსიტეტმა მიიღო საგანმანათლებლო საქმიანობის წარმოების სახელმწიფო ლიცენზია, ხოლო 2008 წლის 8 იანვარს - სახელმწიფო აკრედიტაცია (5 წლის ვადით).
საქართველოს მთავრობამ 2008 წლის 10 დეკემბერს №239 დადგენილებით ცვლილება შეიტანა მთავრობის 2007 წლის №160 დადგენილებაში, რომლის თანხმად, საჯარო სამართლის იურიდიულ პირს, სოხუმის უნივერსიტეტს ეწოდა "საჯარო სამართლის იურიდიული პირი - სოხუმის სახელმწიფო უნივერსიტეტი."
დღეს უნივერსიტეტის ხუთი ფაკულტეტი სპეციალისტებს ამზადებს როგორც საბაკალავრო, ასევე სამაგისტრო და სადოქტორო დონეზე. მოქმედებს ერთი საბაკალავრო-სამაგისტრო პროგრამა და ორი პროფესიული საგანმანათლებლო პროგრამა. უნივერსიტეტი ჩართულია, ევროკავშირისა და აშშ-ს საერთაშორისო საგანმანათლებლო, ასევე სამეცნიერო კვლევით პროექტებში.